මැණික 💎

අඩවන් දෑස කීවේ.. ජීවිතේ අරුතමයි සංවරයි මැණික මාගේ..

ඈතින් කවුරු හරි අහන රේඩියෝවකින් මගෙ හිත පිටතට අරගෙනම කොනිති ගහනව..

ආසම ගීතයක් උනත් පුළුවන් හැම විටම නාහා ඉන්නෙ ඇහේ උල්පත් ඉක්මන් වැඩි නිසාමයි..

"මැණික"

ඒක කොයිතරම් ආදරණීය ඇමතුමක්ද
හෙමින් මම ඇහේ තෙත හැඟුමක් පිහිදමින් හිතනවා..

මැණික කියලා සඳහන් වෙන ගොඩක් ගීත හිතාමතාම මඟෑරලා ඉන්න කාලෙක ඉඳන් හිත පුරුදු කරගෙන උන්නු මගේ මතකය මොහොතකට නිදි බිඳගෙන.. වෙන අයට නින්දේම පේන නපුරු හීන මට පේන්නේ හදිසියෙම නිදි බිඳුනු ඒ වගේ වෙලාවක.. හිත අවදියෙන් තියාගෙන ඒ වගෙ රිදුම් දෙන හීනයක් දකින එක කොයිතරම් වේදනාකාරිද...

"මැණික.."

ඒ වචනය කනට වැටෙන සමහර වෙලාවක අනික් කනින් පිටවෙන්න කලින් හදවත පැත්තෙ රවුමක් දාලා සියුම් රිදුමකින් කොනිත්තලා යන වග ඔයාට මම ඉස්සර කිව්වෙත් නෑ..

ඔයා කවමදාවත් මට මැණික කියලා කතා කරලා නෑ රවීන්ද්‍ර..

මම ඒ තරම් නොවටිනා කෙනෙක් ද ඔයාට.. එහෙනම් ඇයි ඔයා ඒ මැණික අතෑරලා මන් වගෙ නොවටිනා කෙනෙක් පස්සෙ වැටුණෙ.. මට හිතින්ම කෙඳිරෙනව.

ෆෝන් එක අතට ගන්නේ කෙටි පණිවිඩයක් සටහන් කරන්න

"ඇයි මම මැණිකක් නොවෙයිද ඔයාට.."

පණිවිඩය තාවකාලිකව නොයවා මම ආපහු ෆෝන් එක පසෙකින් තියනවා..

ඇයි මට එකම එක දවසකට හරි මැණික කියලා කතා නොකෙරුවෙ..

හීන් හුස්මක් පෙණහළු වලින් පිට වෙනවා එක්කම උගුර වියළිලා හිර වෙනව දැනෙනව.

වතුර වීදුරුවක් එක හුස්මට බීගෙන බීගෙන ගිහින් නළලෙන් ඉනුව දාඩිය බිඳු මම පිහිදලා දැම්මා..

කොයි වෙලෙත් ගිනි අරන් දැවෙන්නේ ඉරට කවුද ඒ තරම් ගින්දරක් දුන්නේ.. පපු මැද්දෑවෙ ගිනි කන්ද අමාරුවෙන් සක්‍රීය වෙන්න නොදී ඉන්න උත්සහ කරන මට ඉබේම හිතෙනවා..

"ඇයි මම විතරක් මැණිකක් නොවුනෙ?" ජනෙල් කවුළුවෙන් පිටත ලෝකය දිහා බලන් මට හිතින් නිහඬවම කෑගැස්සෙනවා..

"මැණිකට වත් නොකීව මගෙ ජීවිතේ ගොඩක් දේවල් ඔයයි දන්නෙ ශාරදා..."

ඔයාගෙ ඉස්සර වචනයක් හදවතට තවමත් ඇහෙනවා..

ඔයාගෙ ඒ ගැඹුරු කටහඬ මගේ හදවත පුරා ගලාගෙන යනවා..

"ඔයයි මැණිකයි දෙන්නෙක්.. දෙන්නට දෙන්න කොයිම විදියකින් වත් සම කරන්න බෑ.. දෙන්නට දෙන්නගෙ සුවිශේෂි ඇවතුම් පැවතුම්.. මට ඔය දෙන්නම විශේෂයි.. ඒත්...

"ඒත් ?"

එයාගෙන් මට නොලැබුණු මන් ආස කරන මොකක්දෝ යමක් මට ඔයාගෙන් ලැබුණා.. එයත් මට ගොඩක් ආදරෙයි.. කිසිම වචනයක් කියන්න බැරි තරම්.. ඔයාගෙන් මට ලැබුණේ මන් කැමති විදියේ ආදරයක්.. අවබෝධයක්.. සමහරක්විටෙක මම මේ තරම් ඔයාට ළංවෙන්න ඇත්තේ ඒ නිසා..

කොයිම විටෙකත් ඒකට හේතුවක් අහන්න එපා.. මොකද මට ඒ ගැන කියන්න හේතුවක් නෑ..

එයා නිසා ඔයාගෙත් ඔයා නිසා එයාගෙත් ආදරේ පොඩ්ඩක් වත් දෙවැනි වෙන්නෙ නෑ..

මට වෙලාකට හිතෙනව මම මහ නරුමයෙක් කියලා ශාරදා... ඔයාලා දෙන්නම මට උපරිමයෙන් ආදරෙයි.. ඔයාලා දෙන්නටම මා අතින් අසාධාරණයක් වෙනව වෙන්න පුළුවන්. ඒත් මගෙන් පෙරළා ඔයාලටත් ඒ ආදරේ මට පුළුවන් හැම විදියෙන්ම පුළුවන් හැමවිටෙකම දෙන්නයි මට ඕනි.. මට ඒක කරන්න අමාරු උනත් මම හැමවිටම ඒකට උත්සහ කරනවා..මන් දන්නව.. ඒක වරදක් වෙන්න පුළුවන්.. ඒත් ඒකයි ඇත්ත..

ඒ කොහොම උනත් එයාට වඩා ඔයා අවබෝධයෙන් මගෙ හිතට එබෙනවා.. ඒ නිසයි මම මේ තරම් ආදරේත්.. මට අතහරින්න බැරි මේ බැඳීම ඒ ආදරේ නිසාමයි.. කෙනෙකුට කරදරයක් වෙන තරමටම ඔයාට ආදරේ දෙන්න පුළුවන් හිතක් තියෙනවා ශාරදා.. ඒක මම එදත් දැනගෙන හිටියා.. හෙටත් ඔයා මට ඒ තරම්ම ආදරේ වග මම දන්නවා.. මගෙ හිතේ තියෙන සේරම දේවල් මට කියන්න බෑ.. කියලා අඬන්නත් බෑ.. මන් පිරිමියෙක්.. ඒත් මගෙ හිතේ ගොඩක් දේවල් මැණික ඉස්සරහදි වඩා නිදහස් වෙන්නෙ ඔයා ඉස්සරහ.. මොකද මගෙ ඕනෑම ස්වරූපයක් ඔයා තේරුම්ගන්න බව මම දන්නවා.. මොනම අවස්තාවකදී උනත් ඔයා මාව ඉවසන බව මට විශ්වාසයි.. මට කියන්න තියෙන්නෙ මෙච්චරයි..

"මම ඔයාට ආදරෙයි.."

"කොච්චරක්ද??"

"ඔයාට ඕනේ තරමටම ශාරදා.."

"හ්ම්ම්.."

"මම දන්නෙ නෑ මේ බැඳීම කොතනින් කොහොම කෙළවරක් දකියිද කියලා.. ඒත් මම මැරෙනකම් ඔයා මගෙ හදවතේ හොඳම තැන ඉන්නවා ශාරදා.. ඔයත් ඒ බව හොඳාකාරවම දන්නවා.."

ගොඩක් ඉස්සර ඈත දවසක ඔයා කීව ඒ වචන කාලෙකින් මගෙ කල්පනාවෙ එහෙ මෙහෙ සක්මන් කරන්න අරන්..

ඒ තරම් විශ්වාසයක්, අවබෝධයක්, ආදරයක් ඇතිව ළං කරගත්තු මම ඇයි රවීන්ද්‍ර මැණිකක් විතරක් නොවුනෙ..

ඒ කොයිතරම් දේවල් මතකයට නැඟුණත් මගේ ස්ත්‍රී මානය ආයෙමත් අහන්නේ එකම ප්‍රශ්නය..

"ඇයි මම ඒ තරම් වටින්නෙ නැතිද.."

අඹ ගහේ කොළ අතරින් ඉර එළිය වැටිලා බිම හෙවණැලි රටා හදලා එකම චමත්කාරයයි.. හුළඟක සළකුණක් වත් නැති නිසා පොඩ්ඩක් වත් හෙලවෙන්නෙ නැතුව ගල් ගැහිලා ඉන්න ඒ හෙවණැලි මේ මොහොතෙ මගෙ හිතට කොයිතරම් සමානද.. ඒ උනත් ඒ හෙවණැලි රටා හරි නැවුම්.. ඇහැට ප්‍රියයි..

කාශ්ටක දවස් වලත් ලස්සනක් හොයමින් මම මගේ හිත නිදැල්ලේ මුදාහරිනවා..

මේ තරම් වෙලා නිශ්චලව තිබුණු මිදුලෙ හෙවණැලි හෙමින් නටන්න අරගෙන.. හීන් සුළඟක් මගෙ මූණෙ ඇවිත් හැපෙනවා.. හුළඟේ ආව මල් පියල්ලක් දෙකක් මගේ කම්මුල හෙමින් ඉඹලා බිම වැටෙනවා..

මැණික කියලා කතා නොකෙරුව පමණින් ඔයා මට නොවටිනා කෙනෙක් නෙවී ශාරදා..

"ඇත්ත මම කවමදාවත් ඔයාට මැණික කියලා කතා කරලා නෑ.."

"ඔයා මට ඊටත් වඩා වටිනවා"

මගේ හදවත පුරුදු ආදරෙන්ම ඉඹලා සුළඟ ආ ලෙසම ආයෙමත් හමාගෙන යන්න යනවා..

සුළඟ එක්කම හමාගෙන යන්න ඇත්නම්.. මට හිතෙනවා.. හිත පිටතදී වඩා ඇතුළාන්තයෙදියි පරිස්සම්..

සටහන් කරපු කෙටි පණිවිඩය නොයවාම මම ජනෙල් පියන් වහලා ආයෙමත් ඇතුළට ආවා..

-රොෂෙල් ෆර්නැන්ඩු-