මගෙ පහන

මගෙ හදවතේ පහන ඔබය. මම ද එහි පහන්තිරය වෙමි. ආදරයේ තෛලයෙන් මාද අවුලුවාලමින් ඔබ ආලෝකයෙන් දැල්වේ. ඇගේ සුසුම් වැදී විටෙක ඔබ නිවේ. මම ද නිවී යමි. ආලෝකය නිවී අන්ධකාරය පැතිර යයි. එවිට මගේ හදවත ගිනි ඇවිලී මම දැවෙමි. ඔබ නිවුණු විට එම ශෝකයෙන් මා දැවෙන බව ඔබ දනී. මම යළිදු ඔබ දල්වමි. මා ඇවිලෙමින් වුවද ඔබ දල්වාලන්නට ඇළුම් කරමි. එයින් මගේ ගත විඩාපත් වුවද නික්මෙන ආලෝකයට මා ප්‍රියකරන නිසාවෙනි. නිවෙන හැමවිටෙක මා ඔබ දල්වන්නේ ඔබ නැති සොවින් මා හදවත පත්තුවෙන බැවිනි. 

ආදරයේ තෛලයෙන් පෙගී පහන්කඩ පහන් දල්වා සැමට ආලෝකය බෙදයි. පහනක් දැල්වීමට තෙල් තිබීම ප්‍රමාණවත් නොවේ. එයට පහන්තිරයද අවැසිය. එනයින් මා දැල්වී ඇවිලී අළුවී නිවී යමි. එවිට පහනේ තෙල් ද සිඳි ගොසිනි. නිවුනු පානකට සුළඟින් විඩාවක් නැත.සුළඟ නිරතුරුවම හමා විත් ඔබ පෙළන බව දනිමි. එබැවින් මා තවත් නොදැල්වීම ඔබ අඳුරේම තබා රහසේම නිවී යමි. එයින් ආලෝකය නිවී ගියද පහන හෝ නිවී සැනසෙනු ඇත. ඔබ විඩාපත් වනු දැකීම මට වේදනාවකි. ඉතින් මඳ කලක් ඔබ හා දැල්වී මා අළු වී යන්නේ නිරාමිස ප්‍රීතියෙනි. 

මන්ද ඔබ මා දැල්වූ මගේ පහනය.

____________________________________________

ඔබ ඇගේය
ඔබ මගේය
හිමිකම ඈටය
අයිතිය මා වෙතය
හිමිකම දෙන්නේය
අයිතිය නොදෙන්නේය
ඔබ ඇවිලෙන්නේය නිවෙන්නේය
ඈ නිවෙන්නේය නිවෙන්නේය
ඔබ අවුලන්නේය නිවෙන්නේය
මා නොනිවෙන්නේය වැලපෙන්නේය

මේ සා අයුක්තියකට ඔබට සමාවක්!!!
ඔබ එයට නුසුදුසුය
සුදුසුකම් ලබන්නේය

ඔබ ඈ නිවන්නේය
ඔබ මා දවන්නේය!!!
ඈ නිවෙන්නේය
ඔබ නිවෙන්නේය
මා නිවුනා සේ හිදින්නේය
ඔබ එයින් සැනසෙන්නේය!!!

ඇගේ හැගීමක තෙත
ඔබ සිඹින්නේය උරන්නේය
මගෙ හැගුම් පෙරන්නේය මනින්නේය
හාදු දී ඈ තවන්නේය පිසින්නේය
මා තනිව හඬන්නේය දොඩන්නේය

ඈ නිවන්නේය ඔබ නිවන්නේය
මා දවන්නේය තනිවේය
ඈ තෙත ගැහැණියකි ඈ තෙත්වෙලාය
මා ද තෙත ගැහැණියකි වියළිලාය !!
ඔබ ඈ තෙත්කළේය ඔබ ඈ තෙත්කළේය
ඔබ මා තෙත්කළේය ඔබ මා වියළුවේය

ඔබ ඇයට ආසක්තය ඇය ඔබට ආසක්තය
ඔබ මටද ආසක්තය මම ඔබට ආසක්තය
ඔබ ඇවිලෙමින් නිවෙන්නේය
ඈ නිවෙමින් දැවෙන්නේය
මා නොනිවම දැවෙන්නේය
හැගීම් තෙතබරියම්ය
නමුදු වහා ඇවිලෙනා සුළුය
ආදරයකි
බැදීමකි හැඟීමකි
සම්ප්‍රයෝගයකි
විප්‍රයෝගයකි
වේදනාවකි
ගින්නකි!!
මා දැවෙමි

ඔබ නිවමි

-රොෂෙල් ෆර්නැන්ඩු-