කිලුටු කන්දක් වගේ පෙනුනත් අනේ මගෙ උණහපුලුවා
පුළුටු බින්ඳක් ගෙට නොවද්දා රැක්කෙ පොඩි දා කැකුළුවා
සිලුටු කඳුළක් ඇහින් වැටුනේ කවුරු බැලුවත් හකුළුවා
ගොකටු අත්තක් ඇනුනා වාගේ පපුව රිදිලා වෙව්ලුවා
පියරු දාලා කොපුල ඉඹලයි නළලෙ මොට්ටුව පවා තිබ්බේ
මියුරු නැළවිලි ඔවා දෙමිනුයි බඩේ බොක්කේ තබා රැක්කේ
පවුරු බිඳගෙන මාර සේනා ඈත එන බව නෑනෙ දැක්කේ
කවුරු කිව්වත් ලපටි හිතකුයි මහත්තයො ඇඟ ඇතුලෙ තිබ්බේ
යාන්තම් පොඩි කකුල් පද්දා යනෙන විට ලී වැටක් බැන්දට
කෝමවත් බැරි උනා කර උස් වයස අල්ලා නවත්තන්නට
කාන්දම වගෙ මමත් එල්ලී උගෙම පස්සෙන් වැටී උන්නට
මාන්දම විය ඉහට ගහලා මතේ අඩුවම ගත පෙලන්නට
මුලින් කොටුකර නිවාරණයට හැඬූ කඳුළිනි යැව්වෙ අල්ලා
ගෙයින් එළියට බහිද්දි දණ ගසා වැඳ පිට උනේ කොල්ලා
බියෙන් උන් කාරණය සරි හිත විටින් විට පැන ගියා හොල්ලා
කොයින් ආවද ගමට විනකල රුදුරු මේ කුඩු මාර බිල්ලා
ගෙදර වළඳක් තියන්නට නෑ හොරෙන් අරගෙන යනව උස්සා
හිඟේ වැඩි කළ බඩම අල්ලා අනේ දඟලයි වාගේ පිස්සා
අරුංගල් දෙක ඉල්ල ඉල්ලා රණ්ඩු කෙරුවා එදා වැස්සා
නොදුන් හින්දා අඩිය හප්පා ගිරිය පුප්පන් ගියා ගස්සා
හිතේ වේගෙට ගෙයින් පිටවී ගියත් ආයෙම ඒවී හිතුවා
මක්කරන්නද වැරදි කෙරුවත් දැනේ දරුදුක කුසෙනි වැදුවා
ආයේ නේනා දුරක් ගිය බව දරා ගන්නට හිතට බැරුවා
අනේ බුදු සර් මමයි අම්මා දෙයියනේ මේ මගේ කොලුවා
-රොෂෙල් ෆර්නැන්ඩු-
No comments:
Post a Comment