හිමේ සීත අරන් ඇවිත් කඳුකරයේ නැවතී
කුරුල්ලනුත් මංගල්ලෙට නිල් තුරු ගී කියති
මේ මිහිරැති සොඳුර සමය ගෙනා කුසුම් යුවති
ඔබේ සුවඳ රැඳුනු මගේ සංසාරෙම පිනැති
විල් තැන්නේ තනිව ගොසින් නෙළා ගෙනා ඕලූ
නිල් මහනෙල් නෙළුම් ඉසව් දන්නේ රන් මාළු
මල් සේරම එක කිරුළට පළඳා මගෙ යාළු
කල් ඇතුවම කැන්දාගෙන එනදා නැත පාළු
පලා පැහැය උරා නටන අරණකි ගී සකුණ
වලා සෑය ඔබේ නමින් තනවමි නැත අකුණ
ගලා බසින නිල් දියවර සිහිලස පිරි පොකුණ
විලාපයන් හමාර කළ නුඹ ප්‍රේමයේ ලකුණ
සලා සුමුදු හසරැල් නුඹ පායන හෝරාවේ
සඳේ නුඹේ නමටම මධු ගී සර ගැයුනාවේ
සෙවණැලි එකිනෙක පැටලී යුග යුග ගෙවුනාවේ
නුඹේ දෙඅත් තුරුලේ මගෙ සසරම නිවුනාවේ
-රොෂෙල් ෆර්නැන්ඩු-
No comments:
Post a Comment