නමුදු හදවතේ ඉසියුම් ලේ නහර නම් හුණුව යන බව දනිමි..
මගේ හදවත සිසිරයේ ගල් ගැසුණු රෝස කුසුමක් යැයි ඉසෙහි මස්තිෂ්කය කුරිරු කෙඳිරිල්ලකින් පවා පීඩා දෙන සෑම කල්හීම මම දෑස් පියන් වසාගෙන නුඹේ ඒ ඉමිහිරිම සිනාව සිහිපත් කරමි,
එවිටෙක අඳුරු ඇසි පියන් අස්සෙහි මතුවන කුඩා ආලෝක කැබිලිති නුඹේ ප්‍රේමවන්ත සිනහවෙන් උපදින බව හඟිමි.
තණ මතින් මතුවෙවී නලියන කණමැදිරි
පොකුරත් තරු විසුල පුරා අහසත් නුඹේ සිනහවත් අතර වැඩි වෙනසක් නොමැති බැව් දැනෙන ඇසිල්ලේ සැනෙකින් නිවී සැනහෙමි.
සිසිර කුණාටුවට හසුව ශීතලෙන් ඔද්දල්ව මිදී ගිය හදවතකින් පලක් නැතැයි මවිසින් හඟින මොහොතකදී නුඹේ මුදු සිනහවක මතකය පවා කොයිතරම් නම් උණුසුම්දැයි සිතමින් මවිත වෙමි.
හදවතේ උණුසුම රඳන්නේත් රුහිර ධාතු කැටි නොගැසී පවතින්නේත් ආදරේ මහ පොදු ගුණාකාරය වූ එකමෙක සිනහහවක් වටා බව දැනී එහි පුදුමාකාරය ගණනය කරමි. අනන්තය ගිණිය නොහැකි ඉලක්කමක් බව උගනිමි.
සවන්පත් වලට හුරුපුරුදු නුඹේ සිනාවත් කටහඬත් තවමත් එසේදැයි සිතමින් සනීපවත් වසන්ත රැයක් නොනිදා නාස්ති කරමි.
මුළු මහත් විශ්වයම පවතින ආදරය පවා උපදින්නේ නුඹේ එක සිනාවකින් බවත් ආදරයට පසු ලොව පවත්නා මිහිරිම දේ වූ සංගීතයට පවා නුඹේ සිනහවෙන් ස්වරයක් අවැසි බවත් විශ්වාස කරමි.
එවන් වූ මාහැඟිම සිනහව පෙර මෙන් මට හිමි නොවන බව අදහාගත නොහැකි තැනෙක දිගු සුසුමක් හෙළා පෙනහළු ඉහිල් කරමි.. පපුතුර හිස් කරමි..
කාගේ හෝ මුවඟක ඔබ දයාබරව වැතිර ඇතැයි සිතමි. කවුරුන් හෝ ආදරණීයව මේ මොහොතෙත් ඔබව විඳිමින් ඉන්නා බැව් නිසැකය..
නුඹ කාගේ හෝ සැනසිල්ලක් වී ඇත.
මම ද සැනසෙමි.
කාගේ හෝ මුවක ආදරණීය සිනහවකට නුඹත් නුඹෙ සිනහවත් හේතුවක් වී ඇති බැව් හඟිමි.
නිර්ලෝභීවම ඔබ එය පිරිනමා ඇති බවත් දනිමි.
කාගේ හෝ වාසනාවන්ත දෙතොලක් ඔබේ සිනහවෙන් සැරසී ඇතැයි සිතා එයින් උපන් නිවීමෙන් මගෙ ළතෙත් සිනහවක් සුළඟේ තවරා එවමි.
ඒ නුඹේ දෙතොලතර රැඳෙනු පිණිසය..!!!
No comments:
Post a Comment